سلاف فواخرجي برسالة مؤثرة:”الخوف أحياناً شجاعة”
نشرت الممثلة السورية سلاف فواخرجي مقطع فيديو عبر حسابها الرسمي على موقع تبادل الصور والفيديوهات انستغرام من إحدى مسلسلاتها.
وأرفقت ذلك برسالة طويلة، قالت فيها:
“الخوف أحيانا شجاعة …لازم نتعامل بجدية أكبر مع الكارثة البشرية الحالية اللي اسمها كورونا ، بعيدا عن نظريات المؤامرة وتحليلها وتفنيدها … الكارثة اللي عم نعيشها أمر واقع مافينا نغض بصر عنه ولانتكبر عليه وكل يوم قدام عيوننا عم ينصاب ويموت عشرات ومئات أحيانا بكل العالم”.
وتابعت:
“مو عيب نخاف ، وبالوقت الحالي شجاعة انو نخاف ، ومسؤولية انو نخاف ، ووعي وثقافة وعاطفة كمان … طبعا اكيد مو لدرجة الهلع ، كرمال نعرف نتصرف بعقلانية وبحكمة … وماحدا يقول انا مارح أثر ، كل شخص فينا بيأثر ، وكل واحد فينا مسؤول لانقاذ حالنا وانقاذ عيلنا وغيرنا واللي منحبهم واللي مامنحبهم”.
وأضافت:
“كلنا سوا حاليا بمركب واحد ، يابننجو يا بنغرق … ويا بنقود السفينة بهدوء وببطء وبعقل وبتروي ولو طال الطريق شوي ، يا بنقود بسرعة وبجنون وبرعونة … والكل بروح … ببساطة… العقل عقلنا والمسار نحنا اللي منحدده”.
وأكملت فواخرجي:
“بنفس الوقت … الكارثة البشرية التانية هي الحالة الاقتصادية اللي تجمدت نتيجة تعليق كل شي بالحياة ، صحيح صحيا القعدة بالبيت لصالحنا بس معيشيا الوضع اصعب من كل الحكي .
ومن الشجاعة والاخلاق نساعد بعض ونحس ونكون لبعض ، مارح نعمل تحديات ومارح نتصور ونعلن … الكل لازم يساعد بدون استثناء … واجب الدولة اكيد … بالمطلق … بس انا عم احكي عن واجبنا الاجتماعي نحنا اتجاه بعض ، اللي معه كتير واللي معه شوي .
لانو اذا مامتنا من الكورونا رح نموت من الجوع ومن الذل ، طالما معظم الامور الحياتية وقفت لأجل غير مسمّى…”.
كما قالت:
“والموت بالمرض بهيك حالة اهون من الموت بذل …
لهيك يمكن متل ماعلمتنا الكورونا نكون اشخاص جيدين التصرف والسلوك والنضافة و و و … كمان كارثة الكورونا عطتنا فرصة نعيش انسانيتنا المفقودة ، والوقت هلأ كتير مناسب لنرجع بشر.. ونحمي حالنا وولادنا وغيرنا … من المرض ، من الجوع ، من العازة والاحتياج … قدمنا وعم نقدم ولازم نقدم اكتر بدون تحديات وبدون تحديد ارقام واعداد ، وكل شي واقل شي منقدمه بيفرق عند كتير ناس”.
وختمت:
“اذا اعتبرنا الوباء غضب من ربنا ، فالانسانية هو عطاء ربنا اللي لازم نمارسه حاليا وبقوة وبشجاعة … ماحدا يقول انا مادخلني … كلنا دخلنا …والايمان المطلوب هو ايماننا بحالنا لنطلع من هالازمة على خير بأقل خسائر ممكنة … والله رح يكون معنا لانه منكون عقلنا وتوكلنا …. العقل ثم التوكل”.
عمار البري
إقرأ أيضًا: منة شلبي تردّ على السؤال الأكثر تداولاً في العالم العربي..تعرّف إلى إجابتها – فيديو
إقرأ أيضًا: لطيفة التونسية ممنوعة من الغناء وتكشف عن الأسباب – وثائق
إقرأ أيضًا: ناهد السباعي تكشف سرّ عدم ذهابها إلى حفل زفافها: “هذا ما حصل معي”!
سلاف فواخرجي – العرّاب